Wednesday, December 7, 2011

لما تعيش لوحدك

لما تعيش لوحدك لازم تتعود تخدم نفسك، لازم تتعود تعتمد علي نفسك، لازم تتعود تبسط نفسك بنفسك و تحايل نفسك بنفسك...لازم تتعود تاخد بالك من نفسك. لما تعيش لوحدك لازم توضب لرحلة قبلها بكتير فتبحث و تحجز و تدفع و ليلة السفر تغسل هدومك و تجهز اكلك و في السفر نفسه تاخد بالك من نفسك. لما تعيش لوحدك لازم  تتعلم تندمج مع ناس مختلفة عنك لمجرد انهم اتحطوا في طريقك  عشان لازم تتعامل مع بشر زيك و إلا هتتجنن. لما تعيش لوحدك لازم تحب نفسك و تدلعها، و تكون لنفسك صديق كويس، لا يشد أوي و لا يرخي أوي. لما تكسل تشد علي نفسك و لما تكون واقع تقوم نفسك بنفسك، لما تعيش لوحدك لازم تتعلم ان كل واحد بينفع نفسه في الآخر و أن اللي بيشيل قربة مخرومة بتخر عليه. يعني مفيش بذاكرلكوا و لا بنجحلكوا، مفيش بشتغلكوا، مفيش "كوا" انت بتعمل لنفسك، عملت لنفسك، معملتش لنفسك، لما تعيش لوحدك تتعلم تحترم الحدود و الخصوصية، تتعلم أن مش معني أن الناس قريبة من بعض انهم يقتحموا حياة بعض بدون استئذان أو داعي. لما تعيش لوحدك تتعلم تقدر الناس اللي كانوا في حياتك و خدموك كتير و حبوك كتير و أنت افتكرته حق مكتسب، لما تعيش لوحدك تتعلم توفر في الميزانية و تفكر أكلت ايه و شربت ايه و صرفت فين، لما تعيش لوحدك تتعلم ترتب حاجاتك عشان لو تاهت انت اللي هتدور و انت اللي هتضطر تشتري غيرها، و هتتعلم ترتب أولوياتك و تستغني عن رفاهية يمكن كان شكلها ضرورية لما تعيش لوحدك لازم تفهم انك مينفعش تعيش في عالمين، هو عالم واحد تدي فيه اللي تقدر عليه، لما تعيش لوحدك لازم تسامح نفسك علي أخطائها و تديها فرصة تصلح شكلها قدامك..لما تعيش لوحدك لازم تحبك عشان أنت عايش معاك طول الوقت..