!قالوا يا فرعون ايه فرعنك قال ملقتش حد يلمني

إلي القارئ العزيز المصري في الأغلب، المتدين غالباً الذي يكيل بمكيالين معظم الأوقات...الذي من الأغلب أنه سيطوي الصفحة بمجرد قراءة أول سطور هذه المقالة لأنها ببساطة صريحة و تتطلب منه صراحة في التفكير.

الفرعون اللي في حياتنا، كل فرعون و مفرعن نفسه، عايزه أقوله بكل بساطة "أنت ملقتش حد يلمك!" أيوا نعم ده حقيقي أنا بكلم سعادة، معالي، نيافة حضرتك. إلي المدرس اللي مستقوي نفسه علي العيال، و المدير اللي مستقوي نفسه علي الموظفين و كل من هو شايف نفسه علي خلق الله بحق و بدون حق عايزه أقوله "لم نفسك"!

أنت، عزيزي القاريء، قد تكون أحد هؤلاء الفراعنة المتفرعنين، أو قد تكون أحد المتفرعن عليهم، قد تكون الجاني أو المجني عليه و في كلتا الحالتين أحب أقولك "كفاية بقي الثقافة دي اللي جابتنا ورا"!!!

ثقافة الفرعون اللي خلتنا سايبين مبارك ريس عشان هو "بابانا"! أو عشان ميصحش ده راجل كبير و تقبل ده علي باباك؟ و عشان هو أكيد فاهم مصلحتنا أكتر مننا و عشان هو "الريس" لازم يبقي فوق و احنا تحت.

ثقافة الفرعون اللي بتنص أن المدرس يكون لا يفقه شيء في أي شيء و هو لا هيبة و لا علم و لا أخلاق و يذل في الطلاب لمجرد أن الزمن الأغبر و الحظ العاثر حطه في منصب و لا في مركز أنه أقوي منهم و يقدر يستقوي عليهم.

حتي يا ربي لو نشاط في الجامعة، نشاط مجرد نشاط ! ، و تلاقي رئيس هذا النشاط شايف حاله و متفرعن علي زملائه...يا أخي "اختشي"!

كل اللي عايزه أقوله، خد بالك من الفراعنة اللي في حياتك، اللي أنت اديتهم فرصة يتعدوا حدودهم معاك و يعاملوك معاملة العبيد لمجرد أن منصبهم أعلي منك. وقف الناس عند حدودها، بالأدب، بالأخلاق ، بالذوق!

لحظة! اوعي تكون فهمت أني بقولك اتعامل بعدم احترام مع غير المحترم، لأ! الاحترام واجب مع كل الناس لكن الحدود برضه واجبة. حط حدود للناس، متسمحش لحد أنه يتفرعن عليك...

يا ريت لو قريت و حسيت أنك واحد من الفراعنة دول تفكر...مش بقولك غير فكر! فكر أنك لو مكانهم مش هتحب يتعمل فيك كده، فكر أنه مفيش رياسة و لا سلطان بيدوم، فكر أن حب الناس مهم زي احترامهم بالضبط، و أن احترام الناس الحقيقي مش بيجي بأنك تفرعن نفسك...

كلمة أخيرة، يوم ما تفتكر نفسك أنك حاجة كبيرة و أنك مش محتاج تتعلم و تتغير كل يوم للأحسن زيك زي اللي تحتك، يوم ما هتبتدي رحلة السقوط و الانحدار، اوعي تقعد في الصفوف الأولي من نفسك، اقعد في الصفوف الأخيرة و خلي الناس هي اللي ترفعك و تقعدك قدام...متقعدش نفسك أنت قدام...و افتكر "قبل السقوط تشامخ الروح"...