حنين

عندي إحساس بالحنين مش عارفة لايه، حنين لمجهول سعيد أو حلم بعيد، أو فرحة غريبة من غير مبرر، أو ضحكة مفكرش في وسطها أنا بضحك ليه، أو أغنية أنسي معاها الدنيا.

حنين ساعات يسعدني و ساعات يحزني و لأنه مجهول إحساسي معاه مجهول و رغم أنه مجهول بستلذ إحساسي فيه. حنين للماضي اللي أنا متأكدة أنه مكنش أحسن كتير من الحاضر و لمستقبل مش ضامنة هيبقي أحسن و لا أوحش. حنين لأشخاص ربوني و أثروا فيا في طفولتي لكن مش عايزة أشوفهم لأن نفسي أحتفظ بصورتهم اللي في دماغي. حنين لحب أنا علي يقين أنه مكنش بيسعدني ، حنين لصديق كان ساعات كتير ميفهمنيش...هو أنا بحن للحلو و لا للوحش؟

ساعات ببقي عايزة اتكلم عايزة أتأمل و لما بحكي اللي بفكر فيه بيفقد معناه، لأن الطرف التاني بيخش طرف في التأمل و ابتدي أحذف اللي مش عايزة أشاركه و أزود اللي ممكن يبهر ، فتوصل الفكرة مشوهة بتحفظات و إضافات كتيرة.

جوة نفسي حتة أنا مش عارفاها بتحب المزيكا الحزينة و الهادية، بتحب الكتب اللي بتتكلم من قلبها مش من علمها. جوايا جزء بيحزن و بيفرح من غير سبب أو بسبب مش عايزة أدور علي أو أعترف بيه. جوايا جزء بيستلذ الحزن و الوحدة أوقات كتيرة. جوايا جزء كان عايز يكتب الكلام ده شعر عشان أحس أني لسة شاطرة في الكتابة. جوايا جزء بيفكر كتير و بيحب التفكير اللي مبيوصلش لنتيجة ملموسة في النهاية، و جوايا جزء رافض للقيود اللي بيفرضها عليا اللي حواليا، ساعات بحس أني عايزة أرفض القالب اللي بتحط فيه و اللي بيفرض عليا تصرفات و طريقة تفكير معينة. بحاول أرضي كل حد أعرفه و أكون لطيفة بالنسبة لكل الناس، عشان كدة اللي يعرفوني بجد قليلين جداً يكادوا يكونوا منعدمين.

أنا اكتشفت أني بحب الكتابة أوي بكل صورها..أنا عندي حنين..حنين لإيه معرفش..